ខេត្តកំពង់ចាម៖ នាព្រឹកថ្ងៃចន្ទ ២រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៨ ខែកញ្ញា ឆ្នាំ២០២៦ នៅវិទ្យាស្ថានគរុកោសល្យខេត្តកំពង់ចាម នាយកដ្ឋានគោលនយោបាយ បានរៀបចំពិធីបើកវគ្គបណ្ដុះបណ្ដាលស្តីពី «ការស្រាវជ្រាវប្រតិបត្តិ» ក្រោមអធិបតីភាព ឯកឧត្ដមបណ្ឌិត ឌី ខាំបូលី អគ្គនាយករង នៃអគ្គនាយកដ្ឋានគោលនយោបាយ និងផែនការ តំណាងឯកឧត្ដមបណ្ឌិត អ៊ុង បូរាត រដ្ឋលេខាធិការ ក្រសួងអប់រំ យុវជន និងកីឡា ដោយមានការអញ្ជើញចូលរួមពី លោក Anders LEE តំណាងអង្គការយូណេស្កូ (UNESCO) លោកប្រធាននាយកដ្ឋានគោលនយោបាយ គ្រូឧទ្ទេសនៃវិទ្យាស្ថានជាតិអប់រំ តំណាងមន្ទីរអប់រំ យុវជន និងកីឡា និងលោកគ្រូ អ្នកគ្រូ ជាសិក្ខាកាមមកពីសាលាគរុកោសល្យ និងវិក្រឹតការ និងសាលាអនុវត្ត ខេត្តកំពង់ឆ្នាំង ខេត្តក្រចេះ ខេត្តព្រះសីហនុ ខេត្តកំពត ខេត្តកំពង់ស្ពឺ ខេត្តកំពង់ធំ ខេត្តបន្ទាយមានជ័យ និងខេត្តពោធិ៍សាត់ សរុបប្រមាណ ៩៥នាក់ ស្រី ៤៤នាក់។ ដោយមានការគាំទ្រពីកម្មវិធីពង្រឹងការអប់រំគ្រូបង្រៀននៅកម្ពុជា (GPE5/STEPCam II) វគ្គបណ្ដុះបណ្ដាលនេះ ប្រព្រឹត្តទៅរយៈពេល ៤ថ្ងៃ គឺចាប់ពីថ្ងៃទី២៨ ដល់ថ្ងៃទី៣០ ខែកញ្ញា ឆ្នាំ២០២៦ សិក្សាដោយផ្ទាល់នៅវិទ្យាស្ថានគរុកោសល្យខេត្តកំពង់ចាម និងថ្ងៃទី០២ ខែតុលា ឆ្នាំ២០២៦ សិក្សាតាមប្រព័ន្ធអនឡាញ។
ការស្រាវជ្រាវប្រតិបត្តិ គឺជាការសិក្សាខ្នាតតូចសម្រាប់បុគ្គល ក្រុមឬអង្គភាពដែលចង់សិក្សាស្វែងរកឱ្យបានស៊ីជម្រៅនូវមូលហេតុជាក់លាក់នៃបញ្ហាដែលកើតមាននៅកន្លែងធ្វើការក្នុងគោលបំណងដើម្បីឱ្យមានការផ្លាស់ប្តូរជាវិជ្ជមានផ្អែកលើភស្តុតាងនៃការស្រាវជ្រាវ។ ថ្លែងនៅក្នុងពិធីបើកសិក្ខាសាលា ឯកឧត្ដមបណ្ឌិត បានរំលេចអំពីសារៈសំខាន់ នៃការស្រាវជ្រាវប្រតិបត្តិ គឺ (១) ការស្រាវជ្រាវនៅជាមួយយើងរាល់ថ្ងៃ ដែលយើងតែងតែធ្វើការសម្រេចចិត្តលើការងារផ្សេងៗជាប្រចាំដែលផ្អែកលើភស្តុតាង និងទិន្នន័យជាក់លាក់ និង (២) ការស្រាវជ្រាវប្រតិបត្តិមានសារៈសំខាន់ណាស់សម្រាប់គ្រូបង្រៀន ដើម្បីដោះស្រាយបញ្ហាប្រឈមក្នុងថ្នាក់រៀន ក៏ដូចជាក្នុងសាលារៀន។ ជាអនុសាសន៍សម្រាប់អនុវត្តបន្ត ឯកឧត្ដមបណ្ឌិតបានគូសបញ្ជាក់ចំណុចសំខាន់ៗ ចំនួន ០២ រួមមាន៖ (១) ការធ្វើឱ្យការស្រាវជ្រាវប្រតិបត្តិ ក្លាយជាប្រព័ន្ធនៅក្នុងសាលាគរុកោសល្យ ដោយអាចបញ្ចូលទៅក្នុងកម្មវិធីសិក្សាជាមុខវិជ្ជាគោល ឬមុខវិជ្ជាបន្ទាប់បន្សំ និង (២) ការរៀបចំឱ្យវគ្គបណ្ដុះបណ្ដាលនេះ ឱ្យមានការកត់ត្រាទៅក្នុងប្រព័ន្ធអភិវឌ្ឍវិជ្ជាជីវៈជាប្រចាំ (CPD) របស់ក្រសួង ដែលលោកគ្រូ អ្នកគ្រូ ទទួលបានក្រេឌីតសម្រាប់ប្រើប្រាស់នៅក្នុងការគន្លងអាជីពគ្រូបង្រៀន។
