1,272 Views
ភ្នំពេញ៖ ថ្ងៃពុធ ៨រោច ខែភទ្របទ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២៩ ខែកញ្ញា ឆ្នាំ២០២១ ជាថ្ងៃបញ្ចប់វគ្គបំប៉នសមត្ថភាពស្តីពី “ការរៀបចំគោលនយោបាយប្រកបដោយបរិយាបន្ន” តាមរយៈកម្មវិធី Zoom Video Conference ដែលបានរៀបចំឡើងដោយនាយកដ្ឋានគោលនយោបាយ ក្រសួងអប់រំ យុវជន និងកីឡា ក្នុងគោលបំណងអភិវឌ្ឍសមត្ថភាពជូនមន្ត្រីអប់រំលើបញ្ញត្តិ និងនីតិវិធីនៃការរៀបចំគោលនយោបាយប្រកបដោយបរិយាបន្ន និងផ្អែកលើភស្ភុតាងបែបវិទ្យាសាស្រ្ត ដើម្បីជំរុញ និងលើកកម្ពស់ការអនុវត្តគោលនយោបាយឱ្យមានប្រសិទ្ធភាព។
ខ្លឹមសារសង្ខេបសំខាន់ៗក្នុងវគ្គបំប៉នសមត្ថភាពរយៈពេល៣ថ្ងៃនេះ ត្រូវបានចែករំលែកដល់សិក្ខាកាមរួមមាន៖ បញ្ញាត្តិនៃគោលនយោបាយសាធារណៈ គោលនយោបាយអប់រំប្រកបដោយបរិយាបន្ន និងដំណើរការនៃការរៀបចំគោលនយោបាយអប់រំដែលមានលក្ខណៈបរិយាបន្ន ដោយផ្តោតសំខាន់ទៅលើតួនាទី និងសារៈសំខាន់របស់ភាគីពាក់ព័ន្ធទាំងអស់។ លើសពីនេះ សិក្ខាកាមទាំងអស់ក៏យល់ច្បាស់អំពីការផ្សារភ្ជាប់រវាងគោលនយោបាយទៅនឹងផែនការ ដោយផ្អែកលើកការស្រាវជ្រាវ និងភស្ភុតាងបែបវិទ្យាសាស្រ្ត។ បន្ថែមពីនេះទៀត សិក្ខាកាមក៏ទទួលបានចំណេះដឹងអំពីលក្ខណៈនៃការពិនិត្យតាមដាន និងវាយតម្លៃការអនុវត្តគោលនយោបាយផងដែរ។
គួរបញ្ជាក់ថា វគ្គបំប៉នសមត្ថភាពនេះ មានរយៈពេល ០៣ថ្ងៃ គឺចាប់ពីថ្ងៃទី ២៧ ដល់ថ្ងៃទី ២៩ ខែកញ្ញា ឆ្នាំ២០២១ ដែលមានការចូលរួមពីអង្គភាពក្រោមឱវាទក្រសួងអប់រំ យុវជន និងកីឡា មន្ទីរអប់រំ យុវជន និងកីឡា រាជធានី ខេត្ត អង្គការ និងដៃគូអភិវឌ្ឍន៍ ព្រមទាំងថ្នាក់ដឹកនាំ មន្ត្រីទាំងអស់ នៃនាយកដ្ឋានគោលនយោបាយ។
Website: https://dopomoeys.com/
