រាជធានីភ្នំពេញ៖ នាយកដ្ឋានគោលនយោបាយនៃក្រសួងអប់រំ យុវជន និងកីឡាបានរៀបចំកិច្ចប្រជុំឆ្លង របាយការណ៍ស្ដីពី ការពិនិត្យតាមដានការអនុវត្តគោលនយោបាយ នៅសាលប្រជុំនៃនាយកដ្ឋានផែនការ កាលពីថ្ងៃសុក្រ ១៥កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២ ខែតុលា ឆ្នាំ២០២០ ចាប់ពីវេលាម៉ោង ៨:៣០ នាទីព្រឹក រហូតដល់ម៉ោង ១០:៣០ នាទីព្រឹក ក្រោមអធិបតីភាពដ៏ខ្ពង់ខ្ពស់ ឯកឧត្ដម លីម សុធា អគ្គនាយកនៃអគ្គនាកដ្ឋានគោលនយោបាយ និងផែនការ ដោយមានសមាស ភាពចូលរួមមាន ប្រធាន អនុប្រធាននាយកដ្ឋាន ប្រធាន អនុប្រធានការិយាល័យ នៃនាយកដ្ឋានទាំង ៤ ក្រោមឱវាទអគ្គនាយកដ្ឋានគោលនយោបាយ និងផែនការ សរុបចំនួន ២០ នាក់។
ក្នុងឱកាសនោះដែរ ឯកឧត្តម អគ្គនាយក បានបញ្ជាក់អំពីចំណាប់អារម្មណ៍ថាអ្វីជា គោលនយោបាយ និងចំណុចសំខាន់ៗដែលត្រូវផ្តោតលើការពិនិត្យតាមដានការអនុវត្តគោលនយោបាយ រួមមានដូចជាវិធីសាស្ត្រ វិសាលភាព និងឧបករណ៍នៃការវាស់វែងជាដើម។
បន្ទាប់ពីបានទទួលរបាយការណ៍ និងស្ដាប់ការធ្វើបទបង្ហាញរបស់ លោកស៊ីវ សម្ផស្ស ប្រធាន ការិយាល័យ នៃនាយកដ្ឋានគោលនយោបាយរួចមក អង្គប្រជុំបានចូលរួមពិភាក្សាលើខ្លឹមសារនៃរបាយ ការណ៍ស្ដីពីការពិនិត្យតាមដានការអនុវត្តគោលនយោបាយយ៉ាងយកចិត្តទុកដាក់។ ឆ្លងតាមកិច្ចពិភាក្សាមក ឯកឧត្តម អគ្គនាយក ប្រធានអង្គប្រជុំ និងអង្គប្រជុំទាំងមូល បានសម្រេច និងផ្ដល់អនុសាសន៍ណែនាំកែលម្អដូចខាងក្រោម៖
លទ្ធផល
- សម្រួលចំណងជើងរបាយការណ៍ទៅជា“របាយការណ៍ស្ដីពីទស្សនៈយល់ឃើញចំពោះ ស្ថានភាព បច្ចុប្បន្ននៃការអនុវត្តគោលនយោ បាយអប់រំ” នៅថ្នាក់ក្រោមជាតិ។
- គោលបំណង វិធីសាស្ត្រ និងវិសាលភាព នៃការស្រាវជ្រាវត្រូវរំលេចឱ្យឃើញឱ្យបានលម្អិត និងច្បាស់លាស់ថាជាការស្ទាបស្ទង់លើទស្សនៈយល់ឃើញរបស់អ្នកអនុវត្តគោលនយោបាយ
- ត្រូវពិនិត្យលើរូបភាព និងអក្ខរាវិរុទ្ធឡើងវិញម្ដងទៀតឱ្យបានច្បាស់លាស់
- អនុសាសន៍នៃរបាយការណ៍មានភាពទូលាយពេកគួរបញ្ជាក់ឱ្យបានច្បាស់លាស់ជាងនេះ
- ត្រូវពិនិត្យលើឧបករណ៍វាស់វែង និងប្រភេទអ្នកចូលរួមឱ្យបានច្បាស់លាស់។
ជំហានបន្ទាប់
- ត្រៀមលក្ខណៈធ្វើបទបង្ហាញដល់ថ្នាក់ដឹកនាំក៏ដូចជានាយកដ្ឋានពាក់ព័ន្ធនៅពេលសមស្របណាមួយជាមួយនឹងការសិក្សាស្រាវជ្រាវថ្មីផ្សេងទៀតរបស់នាយកដ្ឋាន
- ស្នើសុំពិនិត្យតាមដានការអនុវត្តគោលនយោបាយជាអាទិភាពដល់ថ្នាក់ដឹកនាំ
- នាយកដ្ឋានទាំងបួនត្រូវមានកិច្ចសហការគ្នាដើម្បីប្រជុំបកស្រាយនូវរបាយការណ៍មុននឹងប្រជុំផ្សព្វផ្សាយទៅកាន់នាយកដ្ឋានជំនាញ។
០២ តុលា ២០២០ | នាយកដ្ឋានគោលនយោបាយ
