ខេត្តកំពង់ឆ្នាំង÷ នាថ្ងៃសុក្រ ៧ កើត ខែភទ្របទ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២ ខែកញ្ញា ឆ្នាំ២០២២ នាយកដ្ឋានគោលនយោបាយនៃក្រសួងអប់រំ យុវជន និងកីឡា បានរៀបចំសិក្ខាសាលាផ្សព្វផ្សាយលទ្ធផលស្រាវជ្រាវស្តីពី «ការពិនិត្យឡើងវិញអំពីកម្មវិធីបំណិនជីវិតតាមមូលដ្ឋាន និងតួនាទីក្រុមប្រឹក្សាកុមារក្នុងកម្មវិធី» នៅសាលប្រជុំខ មន្ទីរអប់រំ យុវជន និងកីឡា ខេត្តកំពង់ឆ្នាំង ក្រោមអធិបតីភាពរបស់ ឯកឧត្តមបណ្ឌិត ឌី ខាំបូលី អគ្គនាយករងនៃអគ្គនាយកដ្ឋានគោលនយោបាយ និងផែនការ តំណាងឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា។ សិក្ខាសាលានេះ មានគោលបំណងផ្សព្វផ្សាយលទ្ធផលនៃការសិក្សាស្រាវជ្រាវទៅដល់គ្រប់ភាគីពាក់ព័ន្ធ ដើម្បីឆ្លុះបញ្ចាំងពីការអនុវត្តជាក់ស្តែង និងរៀបចំពង្រឹងផែនការសកម្មភាពសម្រាប់អនុវត្តកម្មវិធីបំណិនជីវិតតាមមូលដ្ឋានឱ្យកាន់តែល្អប្រសើរ និងមាននិរន្តរភាព។ ក្នុងវគ្គសិក្ខាសាលានេះ ឯកឧត្តមបណ្ឌិតបានមានប្រសាសន៍កោតសរសើរក្រុមការងារស្រាវជ្រាវរបស់នាយកដ្ឋានគោលនយោបាយ ដែលខិតខំធ្វើការស្រាវជ្រាវឱ្យទទួលបានលទ្ធផលនេះ។ ឯកឧត្តមបន្តថា កម្មវិធីបំណិនជីវិតនេះ គួរបន្ថែមការស្រាវជ្រាវគ្របដណ្តប់ដល់ទាំងកុមារ និងយុវជន។ ម៉្យាងវិញទៀត តម្រូវការនាពេលបច្ចុប្បន្ននេះ គួរបន្ថែមមុខវិជ្ជា បម្រែបម្រួលអាកាសធាតុ។ ទន្ទឹមនឹងនេះ អ្វីដែលជាលទ្ធផលស្រាវជ្រាវ យើងមើលឃើញបញ្ហាប្រឈម និងភាពខ្វះចន្លោះគឺការចូលរួម ការតម្រង់ទិស ដែលមានការខ្វះខាតនៅឡើយ និងការចូលរួមរបស់វិស័យឯកជនក្នុងការលើកកម្ពស់បំណិនជីវិតតាមមូលដ្ឋាន។

គួរបញ្ជាក់ផងដែរថា សមាសភាពអញ្ជើញចូលរួមមានសរុបចំនួន៥៤រូប ដែលក្នុងនោះមាន២៤រូប អគ្គនាយកដ្ឋាន និងនាយកដ្ឋានក្រោមឱវាទទីស្តីការ ក្រសួងអប់រំ យុវជន និងកីឡា ៣០រូប អញ្ជើញមកពីមន្ទីរអយក. ការិយាល័យអយក. និងសាលារៀន នៅខេត្តចំនួន៥ គឺ បាត់ដំបង សៀមរាប កំពត តាកែវ និង ស្ទឹងត្រែង។

 

០៣ កញ្ញា ២០២២ | នាយកដ្ឋានគោលនយោបាយ