1,605 Views
ភ្នំពេញ៖ កាលពីរសៀលថ្ងៃចន្ទ ១៣ រោច ខែភទ្របទ ឆ្នាំឆ្លូវត្រីស័ក ពុទ្ធសករាជ ២៥៦៥ ត្រូវនឹងថ្ងៃទី៤ ខែតុលា ឆ្នាំ២០២១ តាមរយៈកម្មវិធី Zoom Video Conference នាយកដ្ឋានគោលនយោបាយ នៃក្រសួងអប់រំ យុវជន និងកីឡា បានរៀបចំកិច្ចប្រជុំពិភាក្សាស្តីពី «ការរៀបចំ និងដំណើរការអនុស្សរណៈយោគយល់គ្នាMOU» រវាងនាយកដ្ឋានគោលនយោបាយ (នា.គប) និងសាកលវិទ្យាល័យមហាចូឡាឡុងកណរាជវិទ្យាល័យ ខេត្តខនកែន (មចរ.ខក) ប្រទេសថៃ ក្នុងគោលបំណងជជែក ពិភាក្សា និងត្រៀមរៀបចំដំណើរការអនុស្សរណៈយោគយល់គ្នា MOU លើផ្នែកមួយចំនួនដូចជា៖ ការស្រាវជ្រាវ ការបោះពុម្ពកាលិកបត្រ រៀបចំសន្និសីទជាតិ និងអន្តរជាតិ។
ក្នុងកិច្ចចាប់ផ្តើមប្រជុំនេះ លោកស្រីបណ្ឌិត បូ ច័ន្ទគូលិកា ប្រធាននាយកដ្ឋានគោលនយោបាយ មានមតិបើក និងបង្ហាញពីគោលបំណងនៃកិច្ចប្រជុំ។ បន្ទាប់មកព្រះតេជគុណ ព្រះសោភ័ណ្ឌភន្ទនបណ្ឌិត សាកលវិទ្យាធិការងនៃសាកលវិទ្យាល័យមហាចូឡាឡុងកណរាជវិទ្យាល័យ ខេត្តខនកែន ប្រទេសថៃ មានសង្ឃដីកាចំណាប់អារម្មណ៍អំពីចំណុចសំខាន់ៗដែលអាចចុះអនុស្សរណៈរួមគ្នាបាននៅពេលខាងមុខ និងបានអរគុណចំពោះលោកស្រីបណ្ឌិត ប្រធាន នាយកដ្ឋាន ថ្នាក់ដឹកនាំ មន្រ្តីនៃនាយកដ្ឋាន និងអ្នកចូលរួមទាំងអស់ក្នុងកិច្ចប្រជុំដ៏មានសារៈសំខាន់នេះ។
បន្ទាប់ពីនោះ ភាគីទាំងពីរបានធ្វើបទបង្ហាញពីទិដ្ឋភាពទូទៅនៃនា.គប និង មចរ.ខក ព្រមទាំងពិភាក្សាលម្អិតលើចំណុចដែលអាចចុះអនុស្សរណៈរួមគ្នាបាននៅពេលខាងមុខ។
ជារួមកិច្ចប្រជុំពីការរៀបចំនិងដំណើរការអនុស្សរណៈយោគយល់គ្នា (MOU) នេះ បានប្រព្រឹត្តិទៅយ៉ាងរលូន និងល្អប្រសើរ ព្រមទាំងឆ្លើយតបទៅនឹងគោលបំណង។
Website: https://dopomoeys.com/
